खामगांव ग्रामीण हद्दीत तांदुळ कालाबाजारीवर धडक कारवाई

बुलढाणा: पोलीस ठाणे खामगांव ग्रामीण हद्दीत बुलढाणा स्थानिक गुन्हे शाखेने दि. २४/०९/२०२५ रोजी सार्वजनिक वितरण प्रणालीतील तांदुळ काळ्या बाजारात विक्रीसाठी नेणारा ट्रक पकडला. या कारवाईत २६,६५,०००/- रुपये किंमतीचा मुद्देमाल हस्तगत करण्यात आला.

जिल्ह्यात सार्वजनिक वितरण प्रणाली अंतर्गत सामान्य, गरजू व गरीब नागरिकांना वितरीत होणाऱ्या तांदुळासह इतर धान्याची काळ्या बाजारात होणारी चोरटी वाहतूक थांबवण्यासाठी पोलीस अधीक्षक श्री. निलेश तांबे यांनी स्थानिक गुन्हे शाखेला निर्देश दिले होते. या आदेशानुसार पोनि. श्री. सुनिल अंबुलकर यांनी अधिनस्त पोलीस अधिकारी व अंमलदारांचे पथक तयार केले आणि वरिष्ठांच्या मार्गदर्शनाखाली कारवाई केली.

माहितीनुसार, दि. २४/०९/२०२५ रोजी स्थानिक गुन्हे शाखेला संकेत मिळाला की एक व्यक्ती आपल्या ट्रकमध्ये शासनाच्या सार्वजनिक वितरण प्रणालीतील तांदुळ बाळगून बाळापूर शहराकडून नांदूरा दिशेने महामार्गावर जात आहे. या माहितीच्या आधारे पथकाने पारखेड फाट्यावर सापळा रचून ट्रक क्रमांक GJ-23-W-7741 चालकासह पकडला. कारवाईत वाहन चालकाच्या ताब्यातील सार्वजनिक वितरण प्रणालीतील तांदुळ हस्तगत करण्यात आले. पुढील तपास पोलीस ठाणे खामगांव ग्रामीण करत आहे.

पकडलेला चालक मनोज भाई बनुभाई, वय ५३ वर्षे, रा. भावनगर, गुजरात, आहे. हस्तगत मुद्देमालामध्ये २५५ क्विंटल तांदुळ (किंमत ७,६५,०००/- रु.) आणि अशोक लेलँड कंपनीचा ट्रक क्रमांक GJ-23-W-7741 (किंमत १९,००,०००/- रु.) यांचा समावेश आहे. एकूण किंमत २६,६५,०००/- रु. झाली.

सदर कारवाई पोलीस अधीक्षक श्री. निलेश तांबे यांच्या आदेशान्वये आणि अपर पोलीस अधीक्षक श्री. अमोल गायकवाड यांच्या मार्गदर्शनाखाली, पोनि. श्री. सुनिल अंबुलकर यांच्या नेतृत्वाखाली पथकाने केली. यामध्ये पोउपनि. पंकज सपकाळे, पोहेकॉ. एजाज खान, पोकॉ. अमोल शेजोळ, विक्रांत इंगळे आणि चापोकॉ. शिवानंद हेलगे यांनी सक्रिय सहभाग घेतला.

पोलीस अधिकाऱ्यांच्या माहितीनुसार, ही कारवाई जिल्ह्यात सार्वजनिक वितरण प्रणालीतील वस्तूंच्या गैरवापरावर अंकुश घालण्यासाठी आणि काळ्या बाजारातील चोरटी विक्री थांबवण्यासाठी महत्त्वपूर्ण ठरली आहे.