खामगाव शहरातील घरफोडी प्रकरणाची यशस्वी उकल

स्थानीय गुन्हे शाखेची मोठी कामगिरी; १ लाख २० हजारांचा मुद्देमाल हस्तगत, तिघे आरोपी अटकेत

खामगाव (जि. बुलढाणा) – खामगाव शहर पोलिस ठाण्याच्या हद्दीत घडलेल्या घरफोडी प्रकरणाचा छडा लावत स्थानिक गुन्हे शाखेने तिन्ही आरोपींना अटक करून एकूण १,२०,०५४ रुपयांचा मुद्देमाल हस्तगत करण्यात यश मिळवले आहे.

प्रकरणाचा तपशील

दि. २९ ऑगस्ट २०२५ रोजी फिर्यादी शशांक पद्माकर देशपांडे (रा. केलानगर, खामगाव) यांनी शहर पोलिस ठाण्यात तक्रार नोंदवली होती. त्यामध्ये २३ ऑगस्ट ते २७ ऑगस्ट २०२५ दरम्यान अज्ञात चोरट्यांनी त्यांच्या घरात प्रवेश करून मोबाईल, सीसीटीव्ही डिव्हीआर, डोंगल, लॅपटॉप, तसेच चांदीचे दागिने आणि बिस्कीट अशा ५५ हजार ५०० रुपयांचा मुद्देमाल चोरल्याची माहिती दिली होती. या प्रकरणी गुन्हा नोंदवून स्थानिक गुन्हे शाखेने समांतर तपास सुरू केला.

अटक आरोपी

या तपासात तीन आरोपी निष्पन्न करून त्यांना अटक करण्यात आली.

1. पंकज संजय देशमुख (२६, रा. खामगाव)
2. अनिकेत गणेशराव देशमुख (२३, रा. खामगाव)
3. अभिषेक भिमराव हेलोडे (२१, रा. खामगाव)

हस्तगत मुद्देमाल

आरोपींच्या ताब्यातून पोलिसांनी खालीलप्रमाणे मुद्देमाल जप्त केला आहे –

• २७० ग्रॅम चांदी, किंमत ३३,५५४ रुपये
• लॅपटॉप एक नग, किंमत १६,५०० रुपये
• मोबाईल ३ नग, किंमत ३०,००० रुपये
• मोटारसायकल एक नग, किंमत ४०,००० रुपये

अशा प्रकारे एकूण १,२०,०५४ रुपयांचा मुद्देमाल हस्तगत करण्यात आला आहे.

वरिष्ठांचे मार्गदर्शन व पोलिसांची कामगिरी

या कारवाईत पोलिस अधीक्षक निलेश तांबे, अपर पोलिस अधीक्षक श्रेणिक लोढा (खामगाव) व अमोल गायकवाड (बुलढाणा) यांचे मार्गदर्शन लाभले. स्थानिक गुन्हे शाखेचे पोनि. सुनील अंबूलकर यांच्या नेतृत्वाखाली उपनिरीक्षक पंकज सपकाळे, पोहेकॉ. एजाज खान, पो.कॉ. अमोल शेजोळ, अजीज परसुवाले, विक्रांत इंगळे, चा.पो.कॉ. शिवानंद हेलगे, पो.हे.कॉ. राजू आडवे, पो.कॉ. कैलास ठोंबरे आदींच्या पथकाने ही कारवाई केली.

सध्या आरोपींना पुढील कायदेशीर कारवाईसाठी खामगाव शहर पोलिसांच्या ताब्यात देण्यात आले असून, प्रकरणाचा पुढील तपास सुरू आहे.