 |
| चक्कर येऊन ट्रॅक्टरवरून पडल्याने तरुणाचा मृत्यू |
(अतिक खान) मुक्ताईनगर
यावल तालुक्यातील फैजपूर परिसरात रविवारी (दि. ७ सप्टेंबर) दुपारी एक दुर्दैवी घटना घडली. न्हावी गावाजवळील चावदस नगर टोल नाक्याजवळ ट्रॅक्टरवरून खाली पडल्याने २२ वर्षीय तरुणाचा मृत्यू झाला. या घटनेने परिसरात हळहळ व्यक्त होत आहे.
मृत तरुणाचे नाव आदित्य तुळशीराम काठोके (रा. कासारगल्ली, फैजपूर) असे असून, या घटनेची माहिती त्याचे काका विलास बळीराम काठोके (वय ४७) यांनी पोलिसांना दिली.
अचानक चक्कर आल्याने अपघात
मिळालेल्या माहितीनुसार, आदित्य आपल्या मित्रासोबत न्हावी येथून ट्रॅक्टरवरून परत येत होता. प्रवासादरम्यान त्याने अचानक वाहन थांबवण्यास सांगितले आणि “मला चक्कर येत आहे” असे सांगून काही क्षणांत तोल जाऊन ट्रॅक्टरवरून खाली पडला. रस्त्यावर पडल्याने त्याच्या डोक्याला आणि शरीराला गंभीर दुखापत झाली.
त्याला तातडीने डॉ. खाचणे यांच्या दवाखान्यात दाखल करण्यात आले. मात्र, तपासणीअंती डॉक्टरांनी त्याला मृत घोषित केले.
फैजपूर पोलिसांत अकस्मात मृत्यूची नोंद
या घटनेची नोंद फैजपूर पोलीस ठाण्यात अकस्मात मृत्यू म्हणून करण्यात आली आहे. पुढील तपास सहाय्यक फौजदार देवीदास विष्णू सुरदास यांच्या मार्गदर्शनाखाली सुरू आहे.
आदित्यच्या अचानक झालेल्या निधनामुळे काठोके कुटुंबावर दु:खाचा डोंगर कोसळला असून, संपूर्ण गाव शोकमग्न झाला आहे.
