चिखलीत जडीबुटी विक्रेत्यावर चाकू हल्ला; दारूसाठी पैसे न दिल्याने प्रकार
चिखली: चिखली शहरात २७ ऑगस्ट रोजी सकाळी जडीबुटी विकणाऱ्या गणेश गजराजीसिंग ठाकूर (३८, रा. धामणगाव रेल्वे, जि. अमरावती) यांच्यावर चाकू हल्ला झाल्याची धक्कादायक घटना घडली. दारू पिण्यासाठी पैसे न दिल्याच्या रागातून शेख शकील शेख इसराईल उर्फ शक्कू (२८, रा. गौरक्षण वाडी, चिखली) याने हा हल्ला केला. या हल्ल्यात ठाकूर गंभीर जखमी झाले.
ठाकूर हे आपल्या आई-वडिलांसोबत जडीबुटी विकून आपला उदरनिर्वाह करतात. काही दिवसांपासून ते जाफ्राबाद रोड परिसरात राहत होते. आरोपी शकील वारंवार त्यांच्याकडे दारू पिण्यासाठी पैसे मागत होता. २७ ऑगस्ट रोजी सकाळी शकीलने पुन्हा पैसे मागितले. ठाकूर यांनी नकार दिल्यावर शकीलने त्यांच्या गळ्यावर चाकूने वार केला.
नागरिकांच्या मदतीने ठाकूर यांना चिखली उपजिल्हा रुग्णालयात दाखल करण्यात आले. त्यांची प्रकृती आता स्थिर आहे. पोलिसांनी तात्काळ कारवाई करून आरोपी शकीलला अटक केली आहे. या घटनेमुळे परिसरात भीतीचे वातावरण पसरले असून फिरत्या विक्रेत्यांमध्ये असुरक्षिततेची भावना निर्माण झाली आहे.