भारताचे लोहपुरुष सरदार वल्लभभाई पटेल यांच्या जयंतीनिमित्त राष्ट्रीय एकता दिवसाचे औचित्य साधत बुलढाणा जिल्हा पोलीस दलातर्फे आज दिनांक ३१ ऑक्टोबर २०२५ रोजी सकाळी सात वाजता जिल्ह्यातील सर्व तेहतीस पोलीस स्टेशन तसेच पोलीस मुख्यालय येथे रन फॉर युनिटी आणि वॉक फॉर युनिटी या उपक्रमांचे आयोजन करण्यात आले. कार्यक्रमापूर्वी सर्व पोलीस स्टेशनच्या कार्यक्षेत्रात राष्ट्रीय एकता दिवसाची शपथ देण्यात आली. या निमित्ताने एकता, अखंडता आणि सुरक्षिततेची भावना दृढ करण्याचा संदेश देण्यात आला.
पोलीस मुख्यालय, बुलढाणा येथे पोलीस अधीक्षक निलेश तांबे यांनी उपस्थित अधिकारी, कर्मचारी आणि नागरिकांना मार्गदर्शन करत राष्ट्रभावना दृढ करण्याचे आवाहन केले. बँड पथकाने सादर केलेल्या देशभक्तीपर गीतांनी वातावरण भारावून गेले. त्यानंतर रन फॉर युनिटी आणि वॉक फॉर युनिटी या उपक्रमांना प्रारंभ झाला. जिल्ह्यातील सर्व पोलीस ठाण्यांतर्गत हा उपक्रम सुरक्षित मार्गाने आणि आरोग्यविषयक सर्व काळजी घेत यशस्वीरीत्या पार पडला.
कार्यक्रमात उत्साहाने सहभागी झालेल्या नागरिकांमध्ये पुरुष गटात अजय नरोटे, सुरज गवई आणि रणजीत राठोड यांचा सन्मान करण्यात आला. महिला गटात प्रगती राऊत, मृणाल पडोळसे आणि कृष्णाली देशपांडे तर पन्नास वर्षांपेक्षा जास्त वयोगटातील दिलीप तिडके, अजाबराव आखरे आणि सुरेश शिंबरे यांना सन्मानित करण्यात आले. तसेच सम्यक जैन, सिध्दी सोनोने आणि अनिता कापरे यांना प्रोत्साहनपर ट्रॉफी देण्यात आल्या.
संपूर्ण कार्यक्रम पोलीस अधीक्षक निलेश तांबे यांच्या मार्गदर्शनाखाली पार पडला. अपर पोलीस अधीक्षक अमोल गायकवाड, उपविभागीय पोलीस अधिकारी सुधीर पाटील, प्र. पोलीस उपअधीक्षक बाळकृष्ण पावरा, स्थानिक गुन्हे शाखेचे पोलीस निरीक्षक सुनिल अंबुलकर, जिल्हा विशेष शाखेचे पोलीस निरीक्षक अशोक काकिवपुरे, राखीव पोलीस निरीक्षक दिलीप तिडके आणि सपोनि दिपक ढोमणे यांनी कार्यक्रम यशस्वीतेने पार पाडण्यासाठी पुढाकार घेतला.
या कार्यक्रमात जिल्हा पोलीस दलाचे अधिकारी आणि कर्मचारी, गृहरक्षक दल, एनसीसी कॅडेट, एनएसएस विद्यार्थी, विविध शाळा आणि महाविद्यालयांतील विद्यार्थी, आरोग्यविषयक जागृती करणाऱ्या क्लबचे सदस्य, व्यापारी संघटना, पत्रकार संघटना तसेच विविध प्रशासकीय विभागांतील अधिकारी आणि कर्मचारी तसेच मोठ्या संख्येने नागरिकांनी सहभाग नोंदवला. राष्ट्रीय एकता दिवसाच्या शपथेसह एकात्मतेचा संदेश देत रन फॉर युनिटी आणि वॉक फॉर युनिटी हा उपक्रम उत्साहात संपन्न झाला. कार्यक्रमाचे सुत्रसंचालन निलेश रत्नपारखी यांनी केले.
