मुक्ताईनगर (प्रतिनिधी) :
मुक्ताईनगर येथे सकल मराठा समाज बांधवांची बैठक शासकीय विश्रामगृहात उत्साहात पार पडली. या बैठकीस सकल मराठा समाजाचे अध्यक्ष अनंतराव देशमुख अध्यक्षस्थानी होते. या वेळी मराठा समाज बांधवांनी एकत्र येऊन आरक्षण चळवळ आणि समाजहिताच्या विविध विषयांवर चर्चा केली.
मुंबई येथे मराठा संघर्ष योद्धा मनोज जरंगे पाटील हे समाजाच्या आरक्षणाच्या मागणीसाठी उपोषण करत आहेत. त्यांच्या या उपोषणाला मुक्ताईनगर तालुक्यातील मराठा समाज बांधवांचा ठाम पाठींबा जाहीर करण्यात आला. समाजातील बांधवांच्या मागण्या पूर्ण होण्यासाठी स्थानिक स्तरावरून मोठ्या प्रमाणावर मदत आणि नियोजनाची तयारी करण्यात आली आहे.
---
शिष्टमंडळ रवाना
या बैठकीतून मुंबईकडे एक मोठे शिष्टमंडळ रवाना झाले असून तेथे आंदोलनात सहभागी होणाऱ्या समाज बांधवांना आवश्यक ती सर्व मदत पुरवण्याचे काम हाती घेण्यात आले आहे. आंदोलनकर्त्यांना कोणतीही कमतरता भासू नये यासाठी प्रत्येक समाजबांधव आपल्या परीने योगदान देणार असल्याचे बैठकीत ठरले.
---
मुख्यमंत्री आणि तहसीलदारांना निवेदन
महाराष्ट्र राज्याचे मुख्यमंत्री तसेच स्थानिक तहसीलदारांना निवेदन देऊन मनोज जरंगे पाटील यांच्या नेतृत्वाखालील मागण्या तातडीने मान्य करून अंमलात आणाव्यात, अशी मागणी करण्याचा निर्णय या बैठकीत घेण्यात आला.
---
लक्षणीय उपस्थिती
या बैठकीस मुक्ताईनगर तालुक्यातील सकल मराठा समाज बांधव मोठ्या संख्येने उपस्थित होते. तसेच समाजातील विविध क्षेत्रांतील मान्यवर, राजकीय व सामाजिक पदाधिकारी यांनी या बैठकीत हजेरी लावून आंदोलनाला ठाम पाठींबा दिला.
